…”Ada Makna di Balik Keterpurukan.”

Hai…hai…

For ini artikel sekarang, kita mo pake bahasa Manado. Biar musti ja pake bahasa yang formal, nya apa-apa to kalo misalnya dang kita mo promosi sadiki tentang torang pe pulau nyiur melambai itu…hehehe…

Tapi, nih artikel ini, kita mo bacirita tentang kita pe pengalaman tanggal 9 Februari 2011, dimana kita butul-butul sanang komaling. Mar, kita nintau apa yang beking kita sanang…di kampus sih, biasa, kita jalani dengan biasa, kuliah pun nya ada yang spesial, malahan lebe banya itu tugas. Ngali jo. Satu tambung itu tugas da datang. Mulai dari tugas tertulis sampe itu tugas-tugas proyek beking penelitian segala macam jo…antor kita lei mar bingo. Mar sudah jo tare. Dari pada babaveto nya da hambak, lebe bae kita mulai ja beking satu-satu to tuh tugas supaya capat ja klar.

Naaah, kita pas tanggal itu ada mata kuliah Psikologi Belajar deng Psikologi Abnormal. Tuangala jo, banya orang ja tanya, “ngana belajar psikologi abnormal, atau ngana yang nya normal.” Ngeode le kwa…tapi, kasiang, sebagai calon psikolog yang baik dan bersahaja (anceee, itu bahasa dang…), musti ja kase penjelasan  plang-plang no supaya dang itu orang yang ja ba lamu tau no kasiang eh…hehe…

Noh, kong abis itu, ada sementara belajar kata serius-serius tentang materi “stress”, kong ujang basar le menimpa…astajim…kage le kita ujang pe kras skali…dapa inga dang itu lagu-lagu jadul “ujang kras ujang kras, nya da doi bli beras, nenek buka kas, ba bunyi petas-petas…”. dapa inga Manado te kita…hahaha…

Mar sudah ini. Kong ngoni tau, kan so klar kata ini kelas. Jam stenga anam malam komang. Dapa tako toh, mo pulang bagimana le. Kita pe kos sih Cuma sekitar 5 menit kalo bajalang, mar ada ujang komaling, masa mo bajalang di tenga ujang bagini…ngali jo. Depe soe le kwa, kita nya bawa dompet to, makanya, antor mo makang dulu so nimbole, mo nae becak le so nimbole kasiang. Yasudah, lebe bae kita batunggu jo dulu di kampus dengan tamang-tamang. Dorang le banya nimbole tapulang karena ujang karas. Antor yang bawa motor le kwa nimbole tapulang, soalnya lebay kwa itu ujang…dapa tako komaling…hehehe…

Nah, sementara kita ada bakarlota dengan bakusedu dengan tamang-tamang, kita dapa inga, oh tuhai, tuh kos so bocor stow ini deng depe muka so banjir…ngali jo, dari Manado banjir 2 meter, sekarang di mata kaki…kacili kwa itu…hahaha,,,tapi, butul komang, ta pikir kita pe kamar bagimana ini kalo dia bocor…untung itu laptop kita nya taru di lante…

Yasudah, ba karlota turus sampe so jam anam lewat somo stenga tuju, ujang so brenti…nah, langsung deh kita bilang pa kita pe tamang, Wili. “Nebeng kita ne, baku iko sampe di kos.” (tentu pake bahasa Jawa no katu. Kalo le pake bahasa Manado, mo munta ubi dia…haha).

Yasudah, kita sampe di kos…jengjengjengjeng…keodeeee laga….mati lampu…songko le…kita pe napsu dang….mar nya napus ba veto katu no, kan calon psikolog yang bersahaja…anceee…

Sampe di kos, depe muka butul to, amper banjir tinggi, untung tunggu pa kita pulang dulu…hehe, langsung kata ka atas, mati lampu, mar untung skali nyanda bocor…so degdegan kata di kampus, mar untung nyanda bocor kwa no…hehe…jadi, ba pel ulang dengan pe galap nya jadi…kita langsung turung kong pi cari makang…ngali jo, tuh warong makang le mati lampu kasiang. Jadi cuma beli ayang penyet, kong makang di tampa kos no. Soalnya kan kita dapat nasi di tampa kos…pe so sweet komang kita ada makang kemarin…ngoni tau, makang di lante muka pintu rumah kos, ada itu ai, dengan depe suksuk (om itu suksuk..kita le mar bingo dapa tau darimana itu om jadi suksuk) pake lilin bagitu dang…samarupa candle light diner…Cuma komang,,,ngali jo, dengan tua-tua doe…cape deh…kalo kwa dengan sum one kan lumayan…anceeeee..bakuku kita..hahaha…awawawa…..haha

Yasudah, ada sementara makang, mo capat-capat makang. So fugado kita belum mandi…terpaksa capat-capat kase beres itu piring abis makang, nah, timbul dilema pa kita, ini mo mandi ato nyanda…pe galap bagini komang,,,awww, kalo nya mo mandi, mo tatono depe bobou, kalo nya mandi mo babobira ulang…muka tre samarupa aspal tol pe bagus,,,

Nah,,,berbekal lilin, qt pigi di kamar mandi dengan langkah pe gaga…hahaha…lilin taru di muka pintu kamar mandi, karena nya samarupa di manado kasiang, kong liling dang boleh mo taruh di dalam kamar mandi…pe kaninong itu kamar mandi, bagimana ehhh…yasudah, ragu-ragu kita mo mandi buka itu segitga ato nyanda…biar le kasiang nya ada anak-anak kos karena ada tidor, mar ada itu cece kos le…kong dia bahoba…anceeeee…..yasudah, kita putuskan kasiang, pake jo no…mandi-mandi-mandi, kita da ta pikir…awww,,,,kapa kita pe soe bagini kang…pe banyak tugas mar, mati lampu…mo beking tugas di laptop, mar laptop abis baterai…baku tanya dengan tamang kata, baterai lobat…astaga..lengkap to…Abis kita mandi, kita ba seka. Pi maso di kamar…ehhh, pe abis kita ganti baju, manyala itu lampu…hahaha…sangar to…

Sudah ini, abis itu kita babaguling, kong mulai ini otak bakarja…kita ba pikir…aww, ini samua ada arti…kita lagi sanang ini hari, sanang skali komang,,,nah, coba kalo manyala lampu, pasti sekarang kita belum mandi, belum makang. Pasti ada ba hela-hel kalo nya di tampa tidor, di muka laptop, mo online kata. Mar, coba sekarang mati lampu, kita so bole beking itu samua, biarpun awalnya dapa muncul itu rasa-rasa pastiu, samua kita pe tugas rumah tangga terlaksana…

Tamang, itu no kita pe maksud ini artikel…bukang Cuma kita mo bacirita tentang kita pe pengalaman ini hari.kadang le kwa torang bagitu to??? Ada sanang-sanang, mar torang lupa dengan torang pe tugas utama. Mo bantu pa mama kata ba cuci, mar karena ada sanang-sanang mo cari seribu satu alasan, atau nyanda mo ba strika, mar nyanda jadi…itu samua no…kong lagi, torang kan nya mungkin nya dapa masalah to…

Torang kadang kalo so dapa masalah, apa yang pertama kali torang beking??? Mengeluh…ba veto…sama no…kita le bagitu kwa…mar, jang salah, ternyata, dari torang pe masalah itu, toran gbisa ambil makna…kalo torang duduk tenang, beking tenang torang pi diri…dapa rasa no itu makna…torang flash back lagi ka blakang dang….pasti torang mo dapa tau, apa so Tuhan pe maksud for torang. Memang sih kita pe masalah simpel, gampang dang. Cuma le kwa mati lampu…tapi, nyanda, mati lampu di tampa kos adalah sesuatu yang beking sangat soe…ngoni nimbole beking apa-apa padahal tugas rumah dan tugas skola so menumpuk…tapi masa torang mo ba veto???io to???

Enak skali kasiang kalo torang dapa masalah dang, kong torang tau no apa depe makna n depe arti dang…makanya kita bilang di atas…”Ada makna di Balik Keterpurukan.”

Selamat Pagi teman-teman…Selamat beraktivitas…Tuhan Berkati…Amin….

4 thoughts on “…”Ada Makna di Balik Keterpurukan.”

  1. Apapun peristiwa yang kita alami, selalu mengandung arti. Tinggal bagaimana kita menyikapi peristiwa itu dengan menggunakan 2 jenis pikiran : positif atau negatif untuk “mengesahkan” arti dari peristiwa itu sendiri. Semoga sukses……

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s